राम बिराजे (Ram Biraje) - हिन्दू किसान गिरजासंकर कुसबाहा 'कुसराज झाँसी' (Hindu Kisan Girjasankar Kusbaha 'Kusraj Jhansi)

* लेख - " राम बिराजे " *

भौत दिनन में आज ऐसी सुब घड़ी आई हैगी। पाँच सौ बरस कौ बनबास पूरौ करकें आज २२ जनबरी सन २०२४ खों हमाए पुरखा, भारतीय संसकिरती उर हिन्दू किसानन के संरक्छक भगवान श्रीराम अपनी जनमभूम अजुध्या में भब्य राम मंदिर में बिराज रए हैंगे।

राम मंदिर में राम के बिराजबे की खुसी में पूरौ देस दिबाई मना रओ, घी के दिया जला रओ, फूल बरसा रओ उर राम-राम भज रओ। भारत में अब रामजुग आ गओ हैगो। भारत हिन्दू किसानन उर गाँओं कौ देस हैगो। राम देस की भक्ति हैंगे उर किसान देस की सक्ति हैगें। कन-कन में राम हैगें। रौम-रौम में राम हैगें। हर नए काम उर सुब काज की सुरूंआत राम खों सिमरकें करबे बाओ हमाओ देस हैगो। इतै राम-राम सें जीबन की सुरूंआत होत हैगी। राम बिन कौनऊ कछु नईंयां। 'रामधरम' देस कौ धरम हैगो। 'रामधरम' भारत कौ रास्ट्रीय धरम बनबे, जा हमाई उर देसबासियन की इक्छा हैगी।

रामजुग के रामराज में सिरकार हिन्दू किसानन के हित में सारे कदम उठाबे, जा हमाई श्रीराम भगवान सें बिनती हैगी। हम किसान सारी दुनिया की भूंक मिटाबे के लानें राम भरोसे खेती करतई। हमाए अन्न सेंईं सारी दुनिया अपनों पेट भरतई लेकन हम हानि की खेती की बजै सें रोटी, उन्ना, घर उर हमाए मौड़ी-मौडा नौंनी सिक्छा उर रुजगार खों तरसतई। हमाए कबे अच्छे दिनाँ आएँ ?

अब राम अपने घर में बिराज रए हैंगे तो हम किसानन कौ राम पे उर जादां भरोसो बढ़ गओ हैगो कायकि पिरकिती की मार, सूका, बाढ़, ओलाबरसा उर छुट्टर ढ़ोर-जानबरन सें राम अबैई सें हमाई खेती की रक्छा करहैं और हमाई रक्छा के लानें अपनी सेना भेजहैं।

राम खों फिर सें अपने घर अजुध्या राम मंदिर में बिराजबे पे हम हिन्दू किसान राम कौ भौत-भौत बंदन-अभीनंदन करतई, उनके चरनन में सत-सत नमन करतई। पाँच सौ बरस के बनबास के बाद राम खों अजुध्या राम मंदिर में लियाबे बाय उर आज श्रीराम की पिरान पिरतिस्ठा करबे बाय जुगपुरुस, हिन्दू अस्मिता उर भारतीय संसकिरती के रक्छक, भारत के दुनियाईबिख्यात पिरधानमंतरी नरेंद मोदी जू कौ हम हिन्दू किसान भौत-भौत आभार जताऊतई।

।। जै श्रीराम ।।

।। जै सीता ।।

।। जै जै बुंदेलखंड ।।

।। जै जै बुंदेली ।।

©️ हिन्दू किसान गिरजासंकर कुसबाहा 'कुसराज झाँसी'

(राम-सीता के सपूत कुस के बंसज, अगुवाईकारी - बदलाकारी बिचारधारा, बुंदेलखंडी युबा लेखक, समाजिक कारीकरता)

२२/०१/२०२४, रामआगमन

जरबोगॉंओं, झाँसी, अखंड बुंदेलखंड

#रामबिराजे #22जनवरी #रामआरहेहैं #जयश्रीराम #जयसीता #जयलवकुश #दीपावली #रामकादेश #किसानोंकादेश #गॉंवोंकादेश #भारत #रामयुग #रामधर्म #राष्ट्रीयधर्म #राममंदिर

#RamBiraje #22January #RamAaRaheHain #JaiShriRam #JaiSita #JaiLuvKush #Diwali #CountryOfRam #CountryOfKisan #CountryOfGaon #Bharat #RamYug #RamDharma #NationalReligion #RamMandir